Cenlitros
metrocadrado

Deseño industrial

O Milladoiro (Ames, Santiago de Compostela)

Xabier Rilo, Ricardo Tubío, Manuel del Río

www.cenlitrosmetrocadrado.com

Filosofía de traballo

Cenlitrosmetrocadrado é un estudio de deseño e comunicación que se constitúe coa intención de ofrecer un deseño de clara orientación humanista, que vaia máis alá da simple función práctica e que atenda tamén funcións de carácter emocional e social. Cunha identidade de marcado carácter atlántico desenvolve proxectos que van desde o gráfico, produto, espazos ata a coordinación de equipas de traballo en ámbitos creativos.

Referentes

Obxectos artesanais procedentes da tradición, Sargadelos, o deseño escandinavo de Hans Wegner, Tapio Wirkkala, a tradición xaponesa de Naoto Fukasawa e a marca Maruni Wood Industry, Muji, o deseño social de Enzo Mari, a boa forma de Dieter Rams, Braun, a Apple de Jonathan Ive ou Jasper Morrison para Rowenta.

Proxectos destacados

Loxe Mareiro. Acondicionamento de local para hostalería.
A intervención ten como obxectivo reinterpretar o tradicional chiringuito de praia, xogando con conceptos como o carácter temporal das solucións, a improvisación, a polivalencia ou o emprego de materiais reutilizados e de baixo custe.
Vaixela Ferrádica. Deseño e desenvolvemento de soporte en porcelana para a degustación en alta gastronomía
As solucións superficiais destas parceliñas (labrado, plano e cóncavo, para resolver desde o snack seco ata as elaboracións de culler) e as súas combinacións dan lugar a tres pratos que cumpren as funcións habituais nunha vaixela. Ademais de actuar de xeito autónomo, todas as pezas poden combinarse entre si ao longo dos seus eixos principais.
Minia Cadeira. Deseño e desenvolvemento de cadeira para exposición “Da árbore á cadeira”.
Minia está producida a partires de pezas planas de espesor constante que se van orientando en cada punto na dirección dos esforzos. Esta fórmula permítenos conxugar as mellores condicións de resistencia e a lixeireza derivada da redución do material.
Lusi Mesa. Deseño e desenvolvemento de mesa para Alfonso Salgado
Lusi nace coa intención de aunar a calidez e proximidade do mobiliario doméstico e a limpeza e pragmatismo das solucións de oficina, esta vocación por acurtar distancias foi unha constante en todo o proceso de deseño.

Experiencia destacada

Máis que un momento puntual queremos destacar a satisfacción que nos aporta unha liña de traballo interna que puxemos en marcha dende o inicio da actividade do estudio. É un espazo destinado á exploración e investigación a través de pequenos autoencargos que con frecuencia tamén acabamos autoproducindo. A idea inicial era facernos visibles a través destes pequenos proxectos, máis co tempo acabou sendo un campo de traballo que en moitos casos alimenta aos encargos cotiáns do estudio.