Filosofía de traballo
En cada proxecto de deseño de tipografía parto de dúas ideas básicas; por unha banda a concepción da tipografía como unha ferramenta universal para a resolución de calquera problema de comunicación. Dende ese punto de vista a tipografía debe ser efectiva e funcional dentro do contexto para o que xurde. Por outra banda a tipografía é hoxe en día un dos maiores transmisores e definidores de identidade dentro dos proxectos de deseño gráfico. En disciplinas como a identidade corporativa ou o deseño editorial a tipografía que atende ao contexto, á historia e á identidade propia, supón un modelo efectivo para a creación dun programa gráfico completo. En este sentido, as raíces atlánticas, o lugar de orixe, posúen unha influencia definitiva no meu traballo.Como transfundo máis amplo tento seguir as ideas orixinarias que guiaron o Proxecto Moderno dende mediados do século XX, as bases do deseño de progreso e transformador da sociedade que tenta sempre mellorar as condicións de vida do ser humano.
Referentes
Otl AicherPara min un dos referentes máis destacados no mundo do deseño foi o deseñador Alemán Otl Aicher (1922-1991), non so dende o punto de vista do proxecto e o compromiso político senón tamén dende a ética en relación á profesión do deseño. Non so foi capaz de adiantarse aos seus tempos propoñendo dende mediados do século XX cuestións como a ecoloxía e a sustentabilidade dentro dos procesos do deseño senón que elevou a figura do “deseñador total” involucrado dentro de todos os procesos das empresas coas que traballaba. Foi quen de crear proxectos clave que aportaron conceptos novos na historia do deseño e en diferentes campos, como as identidades para os xogos olímpicos de Munich 72 e Lufhtansa, ou mesmo o deseño da tipografía Rotis que supuxo a creación dunha nova categoría tipográfica.
Proxectos destacados
- Deseño da tipografía «Isaac Sans»
A Isaac Sans é unha tipografía “lineal grotesca construída”, que recolle a vella idea de facer compatible a vangarda radical coa funcionalidade dun texto de lectura, pero tamén é unha mirada cara ós referentes históricos da tipografía galega, onde se optou por levar as artes aplicadas —craft— dende o mundo da artesanía, o debuxo ou a ilustración ao deseño de tipografías. Isaac Sans é unha familia tipográfica que tenta recoller esa tradición da letra galega e propoñer unha tipografía contemporánea e versátil, unha ferramenta para resolver un amplo número de problemas no campo da comunicación gráfica. Posúe 7 pesos e as súas correspondentes itálicas e está publicada en formato OpenType con codificación de alfabeto latino “Latin 1” e os seus idiomas soportados. - Deseño de tipografía «Atlantica Serif»
Atlantica Serif é unha tipografía Romana «de Transición» deseñada para usos editoriais. Posúe un baixo contraste entre os trazos horizontais e verticais para favorecer a súa lexibilidade en textos de tamaño pequeno e en medios dixitais. Está publicada en 8 pesos (Thin, Light, Book, Regular, Medium, SemiBold, Bold e Black) e as súas correspondentes itálicas. en formato OpenType con codificación de alfabeto latino «Latin 1» e os seus idiomas soportados. - Deseño de tipografía «Raia»
Raia é unha tipografía lineal xeométrica-industrial con certo carácter humanístico creada para proxectos de sinalización corporativa de interiores. Posúe 3 pesos e as correspondentes itálicas en formato OpenType con codificación de alfabeto «Latin 1» e os seus idiomas soportados.